حريشات بالتمر راقيين

السلام عليكم اليوم جيت ليكم حريشاااات كيجيو راقيين و هشاااااش كنت خديتهم من عند واحد الصديقة عزيزة على قلبي الله يجازيها بخير و الله يرزقها الدرية الصالحة أمانة اللي جربات الوصفة و عجبتها تدعي مع صاحبتي
المقادير:
العقدة ديال التمر لي عنها لاپاط جاهزة تستعملها انا عندي التمر معلك ومعسل ودرتو فالكساس تفور وحيدت ليه العضم ومعستو معا القرفة للتنسيم ولكن راها اختيارية.

العجينة: 250 غرام السميدة رقيقة+ 100 غرام الزبدة مذوبة+1ڤاني+1خمارة من وزن 7غرام+2معالق سنيدة+3ملاعق دقيق+ثمن لتر ديال الحليب (1/8 كاس صغير ديال اتاي)+قبصة ملح.
كنخلطو النواشف ونبسبسوها بالزبدة عاد نزيدو الحليب وكتجي جارية وكنخليوها ربع ساعة .فهاد الاثناء كنوجدو كويرات التمر ونبسطوهوم شوية.

فوق فيلم أليمونتير او بلاستيكة نقية كنبسطو العجينة بيدينا وبرفق(حنو عليها مسكينة) كتجي نصف سنتيمتر ونقطعوها بالقطاعة اي شكل بغيتوه او بالكاس ونحطو وسطها التمر لي بسطناه حتي هو وفوق منها قطعة اخرى ونحاولو نلحموهوم زعما نلاقيوهوم الفوقانية والتحتانية في الجوانب عاد كنحطو عليهوم القطاعة باش تثبت مزيان وتاخد شكل القطاعة. وكنهزوهوم بالفورشيط باش يسهال الهزان ديالهو ومايخسرش الديكور ونحطوهوم فطاوة مدهونة وحدة جنب الاخرى متخافوش مغيتلاصقوش وحتي كنساليو الكمية لي عندنا كنسرطوهوم بموس من الفوق اولا بلاش.
ملاحظة:
هاد الكمية دائما كتخرج ليا 20 حبة .
ويمكن نعوضو التمر بعقدة اللوز او الشكلاط او ليييييييي بغيتو