ديسير بالكبك

السلام عليكم

اليوم عندي ليكم واحد الطريقة إلا ما صدقاتش ليكم كيكة أولا شاطت عندكم و مبغيتوش ترميهوها ها شنو تعملو بيها تبعو معيا
المقادير اللي غتحتاجي:

1 كاس حليب نيدو + 2 م ك مايزينا + 2 م ك سنيدة + 2 خنيشات فاني + نصف لتر ماء
2 كيسان قهوة + شكلاط محكوك أولا فرميسيل و حبات الكرز باش تزيني
نخلطو المقادير ديال الكريم بطراب يدوي مزيان حتى تمتزج المكونات
و نديروه يطيب فوق عافية مهيلة حتى يعقد على فكرة هنا ضفت ملون احمر الكريم كتغيير فقط ممكن تخليه ابيض
وجدت القهوة و قطعت الكيكة مربعات صغار
غمست طريفات ديال كيكة فالقهوة و نزلتهوم فالكاس
غطيت بالكريم و عملت طبيقة أخرى ديال كيكة بنفس الطريقة ثم طبيقة من الكريم زوقت بالشكلاط محكوك
و دخلتها للثلاجة، خاصها تبقى على الأقل ساعتين
جات لذيذة و منسمة بالقهوة و الشكلاط
و بالصحة و الراحة