طورطة بالكريم باتسيير و الكريم شانتيي

طورطة بالكريم باتسيير و الكريم شانتيي

مقادير الجينواز:

4 بيضات، 200 غ سنيدة، فاني،1 خميرة حلوى، 200 غ دقيق، قبصة ملح

الطريقة:

كنطربو البيض و سنيدة و الفاني و شوية ملحة مزيان فوق حمام مريم من بعد نزلو و نكمل التطراب حتى يتضاعف حجم البيض الى ثلاث مرات و غادي نكون خلطت الدقيق مع الخمارة الحمراء و غربلتهم مزيان و خلطهم بالطراب اليدوي مزيان و نبدا نضيف شوية بشوية لخليط البيض و حنا كنحركو بشوية باش منهبطوش البيض و ندهن المول ديالي بالزيت أو زبدة و نرش بالدقيق و نخوي الخليط و إلى الفرن لمدة 35 دقيقة تقريبا.

مقادير الكريم باتسييربالقهوة:

4 أصفر بيض، 4 معالق سنيدة، 3 معالق مايزينا (النشا)، نصف لتر حليب، معلقة كبيرة نسكافي، 50 غ شكلاط اسود

الطريقة:

نخلطو البيض مع سنيدة و نشا مزيان و نغليو الحليب مع نسكافي من بعد ما يغلى نزيدوه بشوية على خليط البيض و نعاود نردو في الكاسرول و نحطو فوق العافية و نا كنحرك حتى يعقاد ليا الكريم و نزيد الشكلاط الكريم و هو باقي سخون باش يدوب.

الكريم شانتتي: و نحضر أيضا الكريم شانتتي بتطريبه مع ربع لتر حليب بارد و ندخلو الثلاجة يبرد لحين الأستعمال

السيرو: كأس سكر سنيدة و نصف كاس ماء و شوية عصير الحامض كنغليوهم فوق العافية حتى نحصلوعلى سيرو

مقادير عجينة الشكلاط:

100غ شكلاط أبيض، معلقة عسل، معلقة ماء بارد، 70 غرام سكر كلاصي و ملونات غدائية

الطريقة:

دوبت الشكلاط في حمام مريم ثم أضفت له الماء مخلط مع العسل و نخلطهم مزيان و خليت الشكلاط يبرد تقريبا ساعة ، ثم أضفت له سكر كلاصي بالتدريج حتى نحصل على عجينة و نقسمها و نستعمل الالوان المفضلة

دبا المونطاج د الطورطة:

غادي تكون الجنواز وجدات نقسمها على ثلاثة

و نسقي الطبقة الأولى بالسيرو و ندير شوية الكريم شانتيي من الجناب

عاد ندير الكيرم باتسيير في الوسط و هكدا ندير لجميع الطبقات حتى نسالي الطبقات بثلاثة و نغطيها بكمية مهمة من الكريم شانتيي و ندخلها تبرد

من بعد نوجد الشريط د الشكلاط و نلصقو على جنابها بالنسبة للشريط الشكلاط اللي زينت بيه الطورطة من الجناب: دوبت الشكلاط في حمام مريم و خديت بابيي سيلفريزي و زوقتو بالشكلاط المهم أنتوما ختارو أي زواقة بغيتو و من بعد خزدي البابي و لصقيه في الجناب و خليه يبرد و من بعد حيدي البابيي و ها هي الزواقة واجدة