طاجين الروكان

اليوم تنقدم لكن طاجين سمك الروكان

وأحسن حاجة فيه أنه كل هبرة ومافيهش الشوك,خاصة اللي عندو الدراري الصغار،سوى العظم الوسطاني
نبداو على بركة الله
المقادير:

سمك الروكان،الخضر،التشرميلة

الزيت الرومية،البلدية،الحامض مرقد،الزيتون.

الطريقة:
التشرميلة:قليل من الملح،الكمون،التحميرة،الثوم،القزبور معدنوس،والزيت البلدية، تنخلطو هاد العناصر باش نحصلو على التشرميلة.
ونرقدو فيها الروكان باش يشربها مزيان.

ونقطعو الخضر دواور،ونستفوها فالطاجين نبداو نفرشو البصلة هي الاولى،موراها الجزر،موراها بطاطا،والفلفلة،ونحطو الروكان فالوسط،ونضيفو مطيشة محكوكة اومشلظة،وتنمرقو بالزيت الرومية وكاس ديال الماء والتشرميلة المتبقية.

ونديروه يطيب على نار مهيلة
ومن بعد ماوجد نصبو عليه شوية الزيت البلدية
ونضيفلو شوية الزيتون