طريقة عمل شموع بالبيت

السلام عليكم اليوم جبت ليكم طريقة باش تصايبو الشميعة د البيض من اليوم حتى وحدة متلوح القشور د البيض متافقين ههههههه


الادوات اللي غادي نحتاجو:

قشور البيض متقوبين من الفوق بحال الصورة و مغسولين مزيان
الشمع العادي ويلا عندك الملون ماشي مشكل
ملونات الشمع باش كنا كنلونو في المدرسة ههههه
الفتيل ديال الشمع
الكردون او عود الاسنان
و المسك باش الشميعة ديالنا تعطي ريحة زوينة و ممكن اضافة زيوت عطرية

الطريقة:

غادي ندوبو الشمع ديالنا على عافية مهيلة بزاااف، و نزيدو طريف ديال ألوان د الشمع المهم اللون الي بغيتي و مللي يدوب زيدي المسك و حركي باش يدوب و هزي الفتيل لصقيه في عود الاسنان كيف موضح في الصورة و ديريه وسط البيضة و كبي الشمع اللي دوبتي و دخليه الكونجلاتور الا كنتي زربانة هههه و ممكن تخليه حتى يبرد على خاطرو

من بعد ما يشد راسو قشري البيضة و ها نتي حصلتي على الشميعة دبا خاصك تقادي ليها القاعدة علاش تجلس هههه

 خودي الشميعة و حطي الكاسرونة على النار و دوزيها واحد الشوية و حطيها فوق كلينيكس صافي

 و كاين عدة طرق باش تزوقي،هادوك اللي مزوقين الفوق كنت زوقتهم بالفاشيون باش كنرسمو فوق الزاج
و إن شاء الله المرة الجاية نوريكم طريقة التزيين و الطريقة ديال الشميعة الدايرة